فيه موضوع مهم لاحظت ان أمهات كتير معندهاش وعي بيه ف وجب التنويه عنه واحنا هنا عشان نفيد بعض ونهتم ب أولادنا :

الفيدروب *

– لاحظت ان أمهات كتير فاكرين انه “كالسيوم” 😕!!!!

طبعا غلط لأنه فيتامين دال.. وهو مهم جدا جدا جدا عشان عضم واسنان البيبي وعشان لاقدر الله مايجيلوش لين عظام وعشان فترة القعاد والتسنين والمشي وتقوية العضم

– لاحظت ان أمهات كتير بتنساه ومش بتديه لاولادها بانتظام وفيه امهات مكبرة دماغها ومش بتديه ومش عارفه أهميته

لو سمحتوا محدش ينسى يدي لأولاده الفيدروب من يوم الولادة لحد سن السنة اربع نقط وبعد السنة الدكتور اللي متابعه معاه للبيبي بيحدد الاحتياج والجرعه.

– يتحط في التلاجة وتاخديه تدي للبيبي وترجعيه التلاجة تاني.. يا جماعة الفكرة في أن الجو حر والحر ممكن يبوظ الأدوية اللي شاكك في النقطة دي يسأل اي دكتور أو صيدلي

– بالنسبه لان فيه أمهات بتقول الطفل بيرجع أو بيشرق منه ف وقفته ف ده مينفعش برده.. اديه للطفل نقطه نقطه في جنب بوقه وتتاكدي انه بلعها وبعدين تديله اللي بعدها ويستحسن يكون قبل الرضعة

– أي فيتامين بيصحصح الطفل ف من الأفضل تديه لابنك الصبح اول ما يصحى وخليه مع أول غيار عشان مايتنساش

– لازم الطفل يتعرض بشكل يومي للشمس ودي حاجة مهمه بس الأفضل التعرض للشمس عشر دقايق اقل شي الى نصف ساعه الصبح بدري أو بعد العصر عشان تقوية العضم

** فيه حاجة غلط عند بعض الأمهات عايزة بس اوضحها وهي فكرة الكالسيوم أن لازم الطفل ياخد كالسيوم.. وربنا مش لازم وماتنصحيش غيرك ب كده ولا تديها اسم كالسيوم تديه ل ابنها ومش الكالسيوم هو اللي حايخلي الطفل يسنن أو يمشي.. لحد السنة الطفل بياخد الكالسيوم من الرضاعة ومن الأكل اللي بيدخله سواء بعد الرابع أو السادس وبعد السنة الطفل بيعمله تحليل شامل ولو طلع عنده نقص كالسيوم الدكتور بيكتبله ومن هنا نرجع تاني لنقطة ضرورة متابعة مراحل نمو الطفل مع دكتور ومانسمعش كلام اللي حوالينا وخلاص

آخر حاجة والنبي يا ماميز اقروا كتير وخلوا عندكم وعي ب كل حاجة واعرفوا كل حاجة عن صحة الطفل اللي بتربوه وبلاش نسمع كلام اي حد واعرفوا ان كل طفل غير التاني واعرفي امتى بالظبط تقدري تقولي على ابنك متأخر في أي حاجة واعملي كل اللي عليكي وسيبي الباقي علي ربنا وع الطفل وتابعي مع دكتور واساليه في كل حاجة

#دكتور_احمد_سعيد_دبور