ازاي اساعد ابني أنه يستغني عن البامبرز؟؟
هنتكلم عن عشر حاجات ، نقدر نعملها تساعدنا على التخلص من البامبرز بسهولة و بسرعه.
١_ اول حاجه هنختار التوقيت الصحيح اللي الجو فيه ميكنش برد، احنا هنشيل البامبرز و الطفل مش هيمسك نفسه من يوم و ليله ، و في معادلة في الطب بتقول
بلل + برد = مرض و كحة و خنفرة و طبعا احنا في غنى عن كده
٢_ هنلبس ملابس خفيفة.. سهلة القلع و اللبس .. مش يبقى الطفل لابس عشر قطع و فوقيهم سالوبيت و فيونكة.. هنفضل نلبس و نقلع الطفل فيهم كل مرة .. و تبقى مستغربين ليه الطفل مش عارف يمسك نفسه و مش طايق البوتي
٣_ احسن طريقه بتجيب نتيجه أن احنا نخلع البامبرز طول الوقت.. ماعدا وقت النوم ( في الاول بس) .. موضوع أن احنا نلبس شويه و نقلع شويه بيعمل لخبطة عند الطفل و من اكتر الاسباب اللي بتاخر الطفل في التمرين
٤_ التمرين على البوتي لازم يكون في كل وقت.. الطفل اللي بيروح حضانه زي ما بيتمرن في البيت لازم يكون بيتمرن في الحضانه بنفس الطريقة .. مينفعش يكون بيخلع البامبرز في البيت و نلبسه في الحضانه
٥_ طريقة حلوة: هنبتدي نقعد الطفل على البوتي كل ربع ساعه و يكون معانا ورقه و قلم و نسجل المرات اللي بيعمل فيها و نبتدي نزود الوقت بين كل قعدة و التانية على حسب طبيعة الطفل لغايه ما نوصل للوقت المناسب للطفل
٦_ الطفل مينفعش يقعد اكتر من ربع ساعه في المرة ، اللي هيقعد اكتر من ربع ساعه و معملش ؛ يبقي مش هيعمل
و كده بتكوني بتضيعي وقتك و بتزعجي طفلك
٧_ من الغلطات اللي الأمهات بتعملها انها تستخدم التليفون او الايباد عشان نلهي الطفل عشان يرضى يقعد، الطفل لازم يبقى قاعد و عارف أن ليه مهمه محددة ( و هي مهمة سامية) لازم ينفذها و يركز فيها
٨_ الطفل في أوقات كتير بيكون رافض يقعد على البوتي عشان يا اما مش مرتاح من القعدة عليها أو خايف منها.. لازم تختار بوتي مناسبه لحجم الطفل و مريحة و يكون الطفل متقبل شكلها.. أنا شفت طفل رافض يقعد عشان خايف من البطة اللي عليها اول ما الأهل غيروه و جابوا ( القصرية ) العاديه بتاعة زمان ،، قعد عادي
٩_ الطفل في السن ده بيتعلم جدا بالتقليد .. ممكن نستخدم لعبة الطفل المفضلة كوسيلة ايضاح و نخليه هو يلبسها و يخلعها و يقعدها بنفسه.. و يديها المكافئة بتاعتها كمان
١٠_ الطفل في السن ده بيحب الامتلاك جدا و بيحب اي حاجه بتاعته.. نزرع فيه أن البوتي ديه بتاعته هو بس ..
هو اللي يجيبه و هو اللي يشيله في المكان اللي هو عاوزه…
و لو حب كمان يزينه بالاستيكر أو بالطريقة اللي يحبها
و طبعا مننساش المكافئة المادية و المعنوية في كل مرة يعمل فيها في البوتي
و نخلي بالنا جدا من التلاته ( لا )
لا عقاب _ لا إهانة _ لا ضرب
التلاته دول بيجيبوا نتائج عكسية
اهم و اخر حاجه : لازم نعرف أن التمرين على البوتي تمرين زي التمرين على اي حاجه جديدة .. الطفل مش مولود متعلمها .. و في معظم الأحوال الطفل مش بيعاند معاكم و لا بيغظكم… انتي نفسك لما بتتعلمي حاجه جديده عمرك ما هتتقنيها من اول مرة .. لازم يكون في اخفاقات و فشل في الاول و لازم تكوني عارفه كده كويس و جاهزة ليه .. افتكري اول طبخة اول سواقه .. الصبر ثم الصبر ثم الصبر
متستعجلوش و متأيسوش و متقارنوش طفلكم بابن حد و متبصيش على ابن اختك اللي اصغر منه و قعد على البوتي