فيه عاصفة ترابية؟ احمي طفلك بالطريقة الصح!
الجو مليان تراب؟ لازم نخلي بالنا من ولادنا خصوصًا اللي بيعانوا من حساسية أو ربو.
إزاي تحمي ابنك في يوم فيه عاصفة ترابية؟
1. بلاش يخرج من البيت تمامًا غير للضرورة القصوى. خلي اليوم ده جوّه البيت.
2. اقفل الشباك والباب كويس علشان التراب ميدخلش.
3. لو اضطر يخرج، البسّه كمامة، ولو صغيرة على سنّه، غطّي وشه بقطعة قطنية خفيفة.
4. ممنوع اللعب في البلكونة أو على السطوح اليوم ده.
5. شغّلي فلتر أو منقّي هوا لو متاح في البيت.
6. لو ابنك عنده حساسية، خلي دواه دايمًا في متناولك، ولو بياخد بخاخ، تأكدي إنه جاهز ومستعمل قبل الخروج.
7. متنسيش تشربيه ميه كتير علشان التراب بيهيّج الأغشية المخاطية وبيسبب جفاف.
لو ظهرت عليه أعراض زي كحة مستمرة أو ضيق تنفس أو صوت صفير في الصدر، توجهي فورًا لأقرب دكتور.
حافظي على صحة ولادك… التراب أخطر مما تتخيلي!