اكتر مشكلة بتقابل الامهات والعيال في الحر ده “حمو النيل”
عبارة عن ايه حمو النيل ده يا دكتره ؟
**ده يا ست الكل عبارة عن التهاب في الغدد العرقيه نتيجه عدم تبخر العرق من على الجسم نتيجه ارتفاع درجة الحرارة والرطوبة 
و الاعراض ايه يا بقي؟
فى الاول بيبقى عبارة عن حبوب حمراء صغيرة برأس او من غير رأس و يظهر أكثر في المناطق اللي صعب العرق يتبخر فيها أو في احتكاك بين الجلد و الهدوم .. زي الرقبة و الظهر و ثنيات الجسم عند الابط و الحوض ..
و الطفل يصاب بحكة شديدة او احساس زي ما يكون الجلد ملسوع لسعة متوسطة من الشمس مع زن و عياط و زمزءة و اريفة و كل مصطلحات العكننة المشهورة طبعا 
طرق الوقاية منه ؟
الوقاية دائما خير من العلاج ..
من الاخر لازم الجلد يتهوي و العرق لازم يتشال من على الجسم بسرعة 
الاستحمام مرتين يوميا ، بـ صابونة جلسرين بلاش الشاور جيل و اللوشن و ما الى ذلك بتسد المسام وتزيد حساسية الجلد.
التكييف الله يكرمكم، علي درجة حرارة 25-26 و خصوصا في اوقات الحر الشديد .. و ايوه البيبي ممكن ينام في التكييف عادي، و لو مفيش تكييف ممكن مروحة بس تكون مش متوجهة على جسم الطفل مباشرة..
طبقة واحدة من الهدوم كفاية، و سيبوا الاطفال تتهوى و بلاش حر و كتمة 
تقليب الأطفال الرضع أثناء النوم و مسح العرق و إعطاء فيتامين د يساعد على تنظيم العرق على فكرة..
بلاش مشاوير في الشمس .. بلاش مشاوير في الشمس .. 
اللبس كله قطن في قطن، الألياف الصناعية و البولي استر و الكلام ده ممكن يعمل التهابات شديدة .. الا طبعا الاطفال اللي بيلعبوا رياضة، في ماركات معينة بتعمل هدوم تساعد على تهوية العرق 
طب بالنسبة للعلاج يا دكتور ؟
العلاج في الاول مهم جدا .. بالنسبة ليكي انتي هتعملي التعليمات اللي فوق دي
بالإضافة لاستخدام لوشن مضاد للحكة زي الكالامين أو البرينجو لوشن او بوليدرم 3 مرات يوميا .. و لو تلحق الموضوع فى الاول مش نحتاج اكتر من كده 
و لو مفيش استجابة للعلاج لابد من زيارة طبيب الاطفال 
و ( متديش اي حاجة من دول من نفسك لو سمحتي )
مضادات للهستامين شراب.
كريمات الكورتيزون من الدرجة البسيطة، و كلمة موجهة للناس اللي عندهم ارتيكاريا من كلمة كورتيزون ( كريمات الكورتيزون زيها زي اي دوا لو بتتاخد صح و بالجرعة المضبوطة يبقى مفيش منها اي قلق خالص )
كريمات مضادات حيوية لو الموضوع متطور، و كل ده بيرجع لرأي الدكتور وتقديره