<

النزلة_المعويه”

■ بنشوف اليومين دول حالات إسهال كتيره جداً وللأسف جزء كبير من الأطفال بييجي بعد ما يكون دخل فى جفاف…فلازم ناخد بالنا يا جماعه..

اولا…

مستحيل نفرق بين سبب دور النزلات المعويه الماشى فى البلد دلوقتى بالذات فى الأطفال هل ده كورونا ولا روتا ولا ادنو فيروس ولا أى سبب تانى زى البطيخ والخوخ .

الحل ؟

●نتعامل بحذر جداً والأمهات تتعقم كويس بعد التعامل مع إفرازات الأطفال . ..

وطبعاً نبعد عن كبار السن خالص طول فترة النزله.

● تعليق المحلول الوريدى مش هوا الأساس ومش كل حاله بتحتاجه..

طالما الطفل مش بيرجّع وقادر على الشرب ؛ لكن فى بعض الحالات مع القئ المستمر بنضطر ندّى محاليل وريديه ونريح المعده لفترة من ٨-١٢ ساعه بعدها نرجع نعطى محلول الجفاف بالفم ؛…

● الكلام ده بقوله لإنى شفت أطفال كل يومين يروحو يعلقو محلول وريدي و يرجعو البيت يسهلو تانى يدخلو فى جفاف يعلقو محلول يتحسنو يسهلو يدخلو فى جفاف و هكذا .

. والحل ؟

محلول_الجفاف الشراب عن طريق الفم للطفل على طول .

■ طيب هل نحتاج ندى ابر مضاد حيوي؟؟

* لأ مش مطلوب أى إبر مضاد حيوى فى النزلات المعوية ، إلا النزلات البكتيرية ودي غالبا معاها حراره عاليه وإسهال مع وحود دم فى البراز احيانا

■ ندى أد إيه محلول جفاف ؟

كيس على ٢٠٠ سم مياه ده التخفيف ، بيتاخد لكل ٤ مرات إسهال أو ترجيع ، ببطء رشفه صغيره ٥ سم كل ٥ دقايق ،

طب لو رجّع الطفل المحلول ؟

يبقى كل ٧ دقايق ، لو رجع نصبر نص ساعه ونجرب تانى ، لو قبل الطفل المحلول فالأفضل أصلا إنه يتاخد طول ما فى إسهال لإن مفيش منه ضرر طول ما الطفل يسهل من تحت ، عوضى حضرتك من فوق بالمحلول .

■ طيب اى افضل أكل مناسب للنزلات..

الأكل اللى يمسك المعده وده زي ايه :البطاطا /البطاطس/ رز /نشا بلاش مياه خالص بنبدلها بمحلول جفاف ، ممكن عصاير من داخل البيت زى عصير تفاخ او جوافه فرش من غير سكر كتعويض ،…

● محلول الجفاف فايدته انه بيعوض الأملاح زى الصوديوم والبوتاسيوم اللى بتفقد من الإسهال ، ولذلك المياه لوحدها مش مناسبه للامتصاص لإن الصوديوم فيها قليل فهتنزل زي ما هيا وتزود الإسهال .

■ اللبن الصناعى ومنتجات الألبان زى الذبادى بشكل عام مش ممنوعه فى النزلات المعويه إلا لو النزله طولت فوق ١٤ يوم و ساعتها ممكن ندّى لبن خالى اللاكتوز للأطفال اللى بيرضعوا صناعي

■ مش مطلوب بشكل عام تحليل براز غير فى حالات معينه. …

● فى ادويه كتير ممكن نديها فى النزلات المعوية ودى بتساعد فى تقليل عدد مرات الاسهال و عدد الايام

واهما

الزنك.

والبكتيريا النافعة

والمطهرات المعويه

لكن يظل محلول الجفاف هو العلاج الأهم فى اى نزله معويه مهما كان السبب ….

#دكتور_احمد_سعيد_دبور