<

موضوع_مهم_لكل_اب_وام

ازاي_اعاقب_ابني

☆ ازاى اعاقب ابنى من غير ما اهينه و اخليه يتعقد ؟؟!!!

● القاعدة_الاولى اللي لازم كلنا نعرفها قبل ما نفكر نعاقب ولادنا هي .

▪الأطفال ذاكرتهم قصيرة المدى

((children has short memory))

.. يعني بينسوا بسرعة ..

▪ للأسف في موضوع العقاب ده بالذات بيكون نسيانهم انتقائي ..

▪يعني هما بينسوا اتعاقبوا ليه بس مينسوش ابدا العقاب_نفسه .

♡ عشان القاعدة دي بالذات لازم نعرف و نلتزم بالآتي:

اولا:

▪ مهما تعاقب ابنك او تعاقبي بنتك على حاجة .. لو شافك انت بتعملها عمره ما هيبطلها .هينسى دايما هو اتعاقب ليه و هيفضل يقلدك ..

▪ مينفعش تعاقب ابنك على الكدب مثلا وهو شايفك بتكدب .

▪مينفعش تعاقبي بنتك على الزعيق و الصوت العالي و انتي صوتك جايب اخر الشارع .

▪خليك دايما واخده بالك من تصرفاتك لأنهم في الاخر مهما تعاقبهم هيقلدوكى برضو

(Be a Role model )

ثانيا:

☆ العقاب ميبقاش عمال_على_بطال .. في الاخر الطفل هينسى هو بيتعاقب ليه من كتر العقاب .

فوتي شوية يا فندم .

☆متعاقبيش على الاخطاء_الصغيرة و التافهة و غير المضرة .. اعملي نفسك مش شايفة ووجهيه بعديها للصح .

ثالثا:

● العقاب لازم يبقى فوري وقت وقوع الخطأ .. عشان يرتبط في ذهن الطفل بالخطأ ..

● مفيش حاجة اسمها تحوشيله و تكتمي في نفسك و تنفجري مرة واحدة !!

● كده عقابك هيبقى شديد على الفاضي و الطفل مش هيفهم هو اتعاقب ليه اساسا .

رابعا:

● الغلط لازم يفضل غلط .. يعني الخطأ اللي اعتبرتيه جسيم و يستحق العقاب .. مينفعش لما يعمله تاني ميتعاقبش عليه .

● كده ابنك هيقول ايه الست اللي بحالات دي ؟؟ مش عايزة تعاقبيه عليه تعملي نفسك مشوفتيهوش ..

خامسا:

● خللي ديما العقاب مرتبط_بالخطأ .

يعني لو كسر لعبته .. يبقى مفيش لعبة تانية .

● لو عمل شقاوة في النادي يبقى محروم من النادي لمدة محددة .. عشان يعرف دايما ان خطأه له عواقب و نتايج مرتبطة بالخطأ ده .

●مش مثلا كسر لعبته يبقى محروم من التلفزيون !! ايه علاقة ده بده ؟!!

سادسا:

● متهدديش بعقاب ابدا و انتي مش متأكدة و مصره انك تعمليه .

● هتهددي بعقاب يبقى لازم_يتنفذ لو الخطأ حصل .

● التهديدات المتكررة اللي في الهوا دي بتخللي الطفل يستخف بيها.

سابعا:

● التهديدات من قبيل : انا هموتك .. انا هدبحك .. انا هكسرك ممنوعة تماما تماما .. انتي بتربيه مش بترعبيه !!

ثامنا:

● التحذير بالعقاب يبقى واضح_و_مباشر .

《يعني مفيش حاجة اسمها اوعى تعمل كده لأوريك》

● يعني يبقى بالصيغة دي:

《 لو مرتبتش الاوضة بتاعتك من اللعب .. اللعبة الفلانية مش هتطلع تاني لمدة اسبوع 》

“تحذير من عاقبة واضحة و صريحة لفعل محدد”

تاسعا:

●مفيش عقاب قصاد_حد 《 لا قريب ولا غريب 》

● علاقتك بابنك و علاقتك ببنتك لازم تبقى خلف الابواب المغلقة !

نقول_تاني .. الغرض من العقاب هو التربية و التقويم .. مش الاهانة و الفضيحة !!

( انتو بتربو عيالكم مش بتذلوهم )

عاشرا:

● اذا اردت ان تطاع أومر بالمستطاع .

خللي اوامرك و قوانينك و الاهداف اللي انت طالبها من ابنك قابلة للتطبيق .

● متحطش هدف لابنك و انت عارف انه مش هيقدر يعمله و بعدين تعاقبه عليه !! ..

● الاهداف و القوانين دي لازم تبقى_ثابتة و متتغيرش على حسب المزاج و الوقت.

الحادي_عشر:

● قولناها ١٠٠ مرة و بنعيدها ممنوع منعا باتا اي حد ايا كان يعلق على عقابك او يعترض عليه قصاد الطفل .”حتى الاب و خصوصا الاب “.

● العقاب يتنفذ و يكمل حتى لو حضرتك مش مقتنع بيه .. اللي يتقال عليه لا يبقى لا .. الكلام و النقاش بينكم يبقى بعيد عن الطفل .

الثاني_عشر:

● لازم تعيد تقييم نتائج عقابك من فترة للتانية .. ميبقاش مش جايب نتيجة و تبقى مصر عليه..

نفسيات_الاطفال مش زي بعض اللي بيجيب نتيجة مع طفل مش شرط يجيب نتيجة مع طفل تاني كل طفل وليه عقابه.

اخيرا

☆ اهم حاجة في الموضوع لازم نعرف ان العقاب بيجي في الاخر بعد التوجيه و الشرح و الاقناع.

♡اقعدوا مع ولادكم

♡العبوا معاهم

♡قربوا منهم

♡اتكلموا معاهم

♡امدحوهم كتير و كافؤوهم على كل حاجة كويسة بيعملوها .

□مش كده و بس .. امدحوهم كمان على كل حاجة وحشة_مش_بيعملوها ..

□المكافئة على عدم فعل السيئ دايما و ابدا بتجيب نتيجة افضل بكتير من العقاب .

منقول للفائدة

#دكتور_احمد_سعيد_دبور