<

عزيزي الأب 

ندعوك معنا الي رحلة اليوم الواحد 

كل المطلوب منك 

١. تصحي الفجر علي زن ابنك .

٢. تقوم ترضعه (بالببرونة طبعا) و تغيرله .

٣. تصحي اخواته تفطرهم و تلبسهم و تنزلهم علي المدرسة .

٤. ترجع للنونو ترضعه (بالببرونة طبعا) و تغيرله تاني .

٥. تروق البيت .

٦. تدخل تحضر اكل و شرب و حاجة حادقة و حاجة حلوة .

٧. تغسل الغسيل اللي محتاج لغسيل .

٨. ترجع للنونو نرضعه (بالببرونة طبعا) و تغيرله .

٩. تسيبه يلعب براحته عشان ميعيطش .

١٠. تكمل تطبيق غسيل و تنشر الغسيل اللي اتغسل .

١١. تنضف مكان النونو اللي لعب .

١٢. ترضع النونو (بالببرونة طبعا) و تغيرله .

١٣. تغرف الاكل و الشرب للعيال بعد ميجوا من المدرسة او الحضانة .

١٤. تأكل العيال اللي جم و تأكل النونو و تغيرلهم كلهم .

١٥. تقعد تعمل الواجب مع العيال و تذاكرلهم .

١٦. تنضف البيت تاني .

١٧. تعشي العيال و ترضع النونو و تغيرله … (بالببرونة)

١٨. تدخل تنيم العيال اللي لازم يناموا عشان المدرسة .

١٩. تحاول تنيم النونو .

٢٠. منمش مش مهم اسهر مع النونو لحد مترجع تنزل العيال تاني الصبح و افضل رضع النونو طول الليل و سكته عشان ميصحيش العيال و ميصحينيش من فضلك عشان مش عارفة انام .

و من فضلك لما اتفضل اجي من برة تكون محضرلي الاكل و مقابلني بإبتسامة عريضة و تحضرلي غياري اللي هلبسه و ياريت لو تكون مروق مكان النونو و مرضعه تاني و مغيرله عشان ميعيطش وانا قاعدة .

ومن فضلك متزعقش للعيال قدامي ولا تتعصب عليهم .

و تسكتهم عشان اعرف انام و اتكلم في الموبايل كمان والعب عليه انا طول النهار في الشغل عايزة ارتاح .

بس اقولك علي حاجة والله يا بختك بيجيلك نوم ، انت لو قضيت معانا رحلة اليوم الواحد من غير نوم كان زمانك بتتمني تغمض عينك دقيقة واحدة بس .

قلة النوم عزيزي الأب + متطلباتك + مطلبات اولادك كفيلة تجيبلي اكتئاب و توترني ، برجاء عدم الإزعاج …

محتاجة انام ساعة واحدة ..

و لكل اب من فضلك لو قريت الكلام دا ، اقعد ساعة واحدة مع الولاد و سيب الأم تنام ، هتفرق معاها و هتفرق معاك ..

الروتين دا ناقصه حاجات كتير ، ناقصه متطلباتك و ناقصه انك تمسك مصروف البيت ، تشتغل ، تكوي ، تجامل اللي حواليك ، تودي ولادك التمرين و المدرسة ، تروح بيهم للدكتور ، و للتطعيم و تقلق علي تعبهم .

حس بزوجتك ولو لساعة واحدة بس